சின்னமனூர் பகுதிகளில் மதுரை வேளாண் கல்லூரி மாணவிகள் கிராமப்புற வேளாண்மை பணி அனுபவத் திட்டத்தின் கீழ் செயல்முறை விளக்கம்!

சின்னமனூர் பகுதிகளில் மதுரை வேளாண் கல்லூரி மாணவிகள் கிராமப்புற வேளாண்மை பணி அனுபவத் திட்டத்தின் கீழ் செயல்முறை விளக்கம்!

தேனி மாவட்டம் சின்னமனூரை அடுத்துள்ள எரசக்கநாயக்கனூரில் கிராமப்புற வேளாண்மைப்பணி அனுபவத் திட்டத்தின் கீழ் மதுரை வேளாண் கல்லூரி மாணவிகள் ரா.நந்தினி ஸ்ரீ, சு. நம்ரதா, கு.நிஷா, மூ. நிவேதா, இர. நிவேதா, ப. பவித்ரா, செ. இர பிரதீபா, மா . பிரேமிகா, ரா. பிரித்தியங்கா தேவி, ர. பிரியதர்ஷினி விவசாயிகளுக்குச் சுழல் வெள்ளைப் பூச்சியின் தாக்கம், பாதிப்புகள் மற்றும் அதனைக் குறைக்கும் முறைகள் குறித்துத் துணை வேளாண்மை அலுவலர் தாமோதரன் முன்னிலையில் உழவர் ஆலோசனை கூட்டம் நடத்தினர். தாமோதரன் சுழல் வெள்ளைப்பூச்சியின் சேதங்களைப் பற்றி முன்னுரை வழங்க ஆலோசனைக்கூட்டம் தொடங்கியது. 

சின்னமனூர் நகராட்சி சுற்றியுள்ள பகுதிகளில் தென்னை மரங்கள் அதிகமாக வளர்க்கப்படுகின்றன. அவற்றை தாக்கும் பூச்சிகளில் சுழல் வெள்ளை பூச்சிகள்  அதிகசேதங்களை ஏற்படுத்துகின்றன.இலைகள் மஞ்சள் நிறமாதல், தேன் பணி சுரப்பின் தாக்குதல், கரும்பூசண நோய், உலர்ந்த இலைகள், மகசூல் குறைவு போன்றவை வெள்ளைப் பூச்சி தாக்கத்தின் அறிகுறிகள்.

இவற்றைக் குறைக்கும் முறைகளான மஞ்சள் நிற ஒட்டும் பொறிகளை  ஏக்கருக்கு எட்டு என்ற எண்ணிக்கையில் கட்டுதல், மைதா கரைசலை (ஒரு கிலோ மைதா + ஐந்து லிட்டர் தண்ணீர் கொண்டு கொதிக்க வைத்து பிறகு 20 லிட்டர் தண்ணீர் சேர்க்கவும்) இலைகளில் அடித்தல், ஒலிப்பொறிகளை ஏக்கருக்கு ஒன்று என்ற விகிதத்தில் வைத்தல் மற்றும் 3% வேப்பெண்ணையைத் தண்ணீரில் கலந்து இலைகளில் தெளித்தல், என்காசியா போன்ற ஒட்டுனைகளைத் தென்னந்தோப்பில் வெளியிடுதல் போன்ற கட்டுப்படுத்தும் மற்றும் குறைக்கும் முறைகளைப் பற்றி மதுரை வேளாண்மை கல்லூரி மாணவிகள் விளக்கியதுடன் தோட்டத்திற்கு நேரடியாக சென்று செயல்முறை விளக்கமும் செய்துக் காட்டினர். 

விவசாயிகளும் அவர்களிடம் சந்தேகங்களை கேட்க, மாணவிகள் மற்றும் துணை வேளாண்மை அலுவலரும் அதற்குப் பதிலளித்தனர். விவசாயிகளும் அதனை ஆர்வத்துடன் கவனித்தனர்.